3 ऑगस्ट रोजी वाढदिवसा दिवशी सांगोला तालुक्यात जन्मलेल्या मुलींच्या नावे 15 हजार रुपयांची मुदत ठेव ठेवण्याचा संकल्प : माजी नगरसेवक आनंदाभाऊ माने
वाढदिवसानिमित्त सांगोला शहरात प्रमुख ठिकाणी होणार वृक्षारोपण
सांगोला : माजी नगरसेवक तथा गटनेते व राजमाता प्रतिष्ठानचे संस्थापक अध्यक्ष आनंदाभाऊ माने यांनी आपल्या 3 ऑगस्ट रोजी वाढदिवसा दिवशी सांगोला शहर व तालुक्यात जन्मलेल्या मुलींच्या नावे प्रत्येकी15 हजार रुपयांची मुदत ठेव ठेवण्याचा संकल्प केला आहे. मुलीच्या जन्माचे स्वागत व्हावे, समाजात मुलगा व मुलगी असा भेदभाव होऊ नये, मुलगा व मुलगी एक समान मानावे.मुलीच्या जन्माचे कुटुंबामध्ये व समाजामध्ये स्वागत व्हावे या उदात्त हेतूने वाढदिवसादिवशी जन्मलेल्या मुलींच्या नावे ठेव ठेवण्याचा केलेला संकल्प खरोखरच कौतुकास्पद आहे. सन 2016 ते 2023 या कालावधीमध्ये 3 ऑगस्ट रोजी वाढदिवसानिमित्त जन्मलेल्या 31मुलींच्या नावे एकूण 3 लाख 48 हजार रुपये ठेव ठेवून सामाजिक उपक्रम व संकल्प पूर्ण केला आहे. तसेच निसर्गाचे संवर्धन व्हावे व निसर्गाचा समतोल राहावा यासाठी वाढदिवसादिवशी मान्यवरांच्या हस्ते सांगोला शहरातील प्रमुख ठिकाणी वृक्षारोपण करण्यात येणार आहे. अशी माहिती आनंदाभाऊ माने यांनी दिली आहे.
मा.नगरसेवक गटनेते आनंदाभाऊ माने यांनी 3 ऑगस्ट रोजी आपल्या वाढदिवसादिवशी जन्मलेल्या मुलींच्या नावे सन 2016 पासून पतसंस्थेत मुदत ठेव ठेवून सामाजिक बांधिलकी बरोबर मुलींच्या जन्माचे स्वागत व्हावे व समाजात मुलींचा जन्मदर वाढावा या हेतूने हा बहुमोल संकल्प यावर्षीही चालू ठेवला आहे. 3 ऑगस्ट 2024 रोजी सांगोला शहर व तालुक्यात जन्मलेल्या मुलींच्या नावे प्रत्येकी 15 हजार रुपयांची मुदत ठेव ठेवण्यात येणार आहे. तालुक्यात 3 ऑगस्ट 2024 रोजी ज्या कुटुंबामध्ये मुलीचा जन्म झाला आहे त्यांनी डॉक्टरांचा जन्माचा दाखला व मुलीचा जन्म घरी झाला असल्यास तशा प्रकारचा पुरावा माहितीसाठी द्यावा. मुलीच्या जन्माची नोंद करण्यासाठी राशन कार्ड, मुलीच्या आईचे व वडिलांचे आधार कार्ड झेरॉक्स व आईचे आयडेंटी साईज 2 फोटो 5 ऑगस्ट पर्यंत राजमाता प्रतिष्ठान कार्यालय , ग्रामीण रुग्णालयाशेजारी सांगोला येथे जमा करावे असे आवाहन माजी नगरसेवक आनंदाभाऊ माने यांच्याकडून करण्यात येत आहेआहे. मुलीच्या नावे ठेवण्यात आलेली सदरची ठेव मुलीला 18 वर्षे पूर्ण झाल्यानंतर पालकांना दिली जाणार आहे.
सन 2016 साली 5 मुलींच्या नावे प्रत्येकी 5 हजार रुपये प्रमाणे मुदत ठेव ठेवली. 2017 साली 4 मुलींच्या नावे प्रत्येकी 7 हजार रुपये प्रमाणे मुदत ठेव ठेवली . 2018 साली 2 मुलींच्या नावे प्रत्येकी 10 हजार रुपयांची मुदत ठेव ठेवण्यात आली. 2019 साली 5 मुलींच्या नावे प्रत्येकी 10 हजार रुपयांची मुदतठेव ठेवण्यात आली. सन 2021 साली 7 मुलींच्या नावे प्रत्येकी 15 हजार रुपयांची ठेव ठेवण्यात आली. 2022 मध्ये 6 मुलींच्या नावे प्रत्येकी 15 हजार रुपयांची ठेव ठेवण्यात आली. 20 23 मध्ये 2 मुलींच्या नावे प्रत्येकी 15 हजार रुपयांची ठेवण्यात आली. सन 2016 ते 2023 या कालावधीत वाढदिवसा दिवशी जन्मलेल्या 31 मुलींच्या नावे एकूण 3 लाख 48 हजार रुपये मुदत ठेव ठेवली आहे.राजमाता प्रतिष्ठानचे संस्थापक अध्यक्ष माजी नगरसेवक आनंदाभाऊ माने यांच्या वाढदिवसानिमित्त मान्यवरांच्या हस्ते सांगोला शहरातील प्रमुख ठिकाणी वृक्षारोपण करण्यात येणार असल्याची माहिती आनंदाभाऊ माने मित्रपरिवार यांच्याकडून देण्यात आली आहे.
