१५ मार्च पासून सांगोल्यातून आता थेट मुंबईला एक्सप्रेस रेल्वे

सांगोला : पंढरपूर येथून दादर मुंबईला जाणाऱ्या दादर-पंढरपूर-दादर या एक्सप्रेस रेल्वेचा विस्तार व्हाया सांगोला, मिरज, सांगली मार्गे सातारा पर्यंत विस्तार करण्यात आलेली रेल्वे शुक्रवार १५ मार्च पासून सुरू होणार असल्याने सांगोलाकरांना मुंबई व साताऱ्यास थेट जाण्याची सोय होणार आहे. या बाबतचे प्रसिध्दी पत्रक मध्य रेल्वेने प्रसिद्ध केले आहे. या रेल्वेमुळे सांगोलाकरांची अनेक दिवसांपासून मुंबईला थेट जाण्याची मागणी पूर्ण होणार आहे.

ट्रेन नं.११०२७ दादर-पंढरपूर ही गाडी आठवडयातून रविवार, सोमवार व शुक्रवारी धावणार आहे, ही रेल्वे दादर हुन रात्री ११ वाजून ५५ मिनिटांनी निघून सकाळी ८ वाजून ३० मिनिटांनी पंढरपूर येथे पोहचेल. पुढे हीच रेल्वे,सांगोला, म्हसोबा डोंगरगाव, जत रोड, ढालगाव, कवठेमहंकाळ , मिरज, सांगली, भिलवडी, किर्लोस्करवाडी, ताकारी, कराड, मसुर, कोरेगाव येथे थांबा घेत सातारा येथे दुपारी २ वाजून १० मिनिटांनी पोहोचेल.परत तीच रेल्वे ट्रेन नं.११०२८ सातारा-दादर ही सातारा येथून ३ वाजून २० मिनिटांनी निघुन पंढरपूर येथे वरील सर्व थांबे घेवून व्हाया मिरज, सांगोला मार्गे रात्री ९ वाजून ३५ मिनिटांनी पंढरपूर येथे पोहोचून ९ वाजून ४० मिनिटांनी दादर- मुंबई कडे कुर्डूवाडी मार्गे रवाना होणार आहे.

विस्तारीत दादर – सातारा ही रेल्वे सोमवार, मंगळवार व शनिवारी धावेल तर सातारा-दादर ही रेल्वे रविवार, सोमवार व शुक्रवारी धावणार आहे.

या विस्तारीत रेल्वे मुळे सांगोलाकरांना मुंबई, पुणे, सातारा, कराड येथे जाण्याकरिता थेट सांगोल्यातून एक्सप्रेस रेल्वेने प्रवास करता येणार असल्याने प्रवाशांची मोठी सोय होणार आहे.